News24

'Buffett-groep bied winskopie'

2012-05-06 05:00 Die sowat 40 000 beleggers wat die naweek die jaarvergadering van Berkshire Hathaway in die Amerikaanse dorpie Ohama bygewoon het, het ook baie tyd deurbring in die Mall of Buffett, ’n tydelike inkopiesentrum waar produkte verkoop word wat die groep se filiale vervaardig. Onder die produkte wat te koop aangebied word, is lekkergoed van See’s Candies, stewels van Justin Brands en Ginsu-messe van Douglas Quikut.

Daar is egter kenners wat meen die grootste winskopie wat die naweek beskikbaar was, was aandele in Berk­shire Hathaway. Die aandeelprys van die maatskappy, wat deur die legendariese beleggingsghoeroe Warren Buffett op die been gebring is, het die afgelope paar jaar nie watwonders gepresteer  nie en bied tans baie potensiaal teen ’n lae risiko. David Rolfe, beleggingshoof van Wedgewood Partners, wat sowat 7,7% van sy kliënte se geld in Berk­shire Hathway belê het, raam dat die aandeelprys sowat 40% minder as die intrinsieke waarde van die bates is.

“Dit is moeilik om ’n belegging van dié gehalte te kry wat meer ondergewaardeer is.” Tim Hartch, medebestuurder van die BBH Core Fund, wat bates van $1,8 miljard het, raam dat Berkshire Hathaway se A-aandele teen ’n diskonto van sowat 30% op die onderliggende intrinsieke waarde verhandel.

“Alle aandele vaar soms swakker as die mark, maar ons konsentreer op die onderliggende bedrywighede van maatskappye, en hulle vaar baie goed. “

’n Belegger soek gesonde, winsgewende langtermynbates teen ’n lae prys en dit is wat dié maatskappy bied.”  Sowat 6% van BBH Core Select se bates onder bestuur is in Berkshire belê. Buffett het in sy mees onlangse nuusbrief aan beleggers gesê dit is die maatskappy se doelwit om die intrinsieke waarde van die onderneming in ’n vinniger tempo as die waarde van die Standard & Poor’s-indeks van die New Yorkse aandelebeurs te laat groei.

In die 42 jaar wat Buffett in beheer van sake is, het die onderneming oor enige tydperk van vyf jaar dié doelwit bereik. Dit is ’n ingewikkelde kuns om die intrinsieke waarde van ’n onderneming te bereken en Buffett self verkies die boekwaarde – die netto waarde minus die verpligtinge.

Op dié grondslag verhandel Berk­shire Hathaway se aandele teen 120% van die boekwaarde. Wat Berkshire Hathaway se aandele nog aantrekliker maak, is sy beleid om aandele terug te koop as hulle teen minder as 110% van die boekwaarde verhandel.  Dit beteken dat die belegger teen die huidige prys byna geen risiko loop nie omdat die maatskappy bereid is om sy aandele terug te koop as die aandeelprys met sowat 10% daal.

David Winters, bestuurder van die Wintergreen Value Fund, met bates van $1,6 miljard onder bestuur, sê die terugkoopbeleid is een van die redes waarom die fonds sy blootstelling aan Berkshire Hathaway van 3% van sy bates tot sowat 4,5% verhoog het.

“Dié aandeel bied ’n besondere koopgeleentheid.  Sy bedrywighede hou aan groei, die aandeelprys het baie min gegroei en dan is daar ’n aanbod om die aandele terug te koop, wat feitlik alle risiko uitskakel, met baie opwaartse potensiaal.” Berkshire Hathaway se A-aandele verhandel tans in die omgewing van $120 000 per aandeel, maar Winters meen ’n konserwatiewe raming van die intrinsieke waarde van die aandeel is $160 000 en dit kan maklik binnekort tot $180 000 groei.

Buffett-groep se beleggings ondergewaardeer

Een van die redes waarom Berk­shire Hathaway se aandeelprys die afgelope paar jaar nie so goed gepresteer het soos wat hy kon nie, is onsekerheid oor wat gaan gebeur wanneer die stigter, Warren Buffett (81), nie meer aan die stuur is nie. Pat Dorsey, president van Sanibel Captive Investment Advisors, sê die kommer is nie gering nie. Die kwessie is Buffett se ouderdom en wie hom gaan opvolg. Die  feit dat Buffett die maatskappy reeds vir die fase ná sy aftrede geposisioneer het, word heeltemal misgekyk. Berkshire Hathaway is nou minder afhanklik van sy beleggingsportefeulje – en dus van Buffett se legendariese beleggingsvermoëns – en meer afhanklik van die bedrywighede van sy groeiende getal volfiliale.

“Buffett het die afgelope tien jaar  die aard van die maatskappy verander van ’n beleggingsfonds in ’n reuse-bedryfsmaatskappy waarvan die filiale wins sal genereer al is Buffett nie meer aan die stuur nie.” Buffett het die laaste tyd baie moeite gedoen om dié feit by beleggers tuis te bring.

Hy skryf in die mees onlangse jaarverslag dat die verdienste per aandeel van die groep se beleggingsbedrywighede in die afgelope tien jaar gemiddeld met minder as 7% gestyg het, teenoor die gemiddelde meer as 20% van die vorige jaar.  Daarteenoor het die voorbelaste wins per aandeel van sy bedrywighede die afgelope tien jaar met meer as 20% per jaar verbeter, met die uitsondering van die versekeringsbedrywighede.

In ’n navorsingsverslag van die Universiteit van Maryland word gesê Berkshire se volfiliale het almal ’n mededingende voordeel in hul onderskeie bedryfsektore wat nie sal verdwyn as Buffett nie meer daar is nie. “Buffett het presies geweet waarna hy moet soek toe hy ondernemings koop.” Dorsey meen Buffett se besluit om in kapitaalintensiewe ondernemings soos die Amerikaanse spoorweë en die nutsmaatskappy MidAmerican Energy te belê, was potensieel ’n meesterskuif.  “Ondernemings soos dié het kapitaalbehoeftes en sal die kontant opslurp wat die ander maatskappye genereer.

“Daar sal dus nie elke jaar besluite geneem moet word oor hoe om kapitaal aan te wend nie. Dit verminder die risiko dat Buffett se opvolger ’n gemors van sake kan maak. Die groep gaan baie minder afhanklik wees van wie in beheer is,” het Dorsey gesê. Buffett wil graag hê sy seun Howard moet hom opvolg as voorsitter om te verseker dat die kultuur in die groep behoue bly.

Dit is egter te betwyfel of Howard, of enigiemand anders, soveel invloed in die sakewêreld sal hê as dié legende. Buffett kon die telefoon optel en transaksies beklink, tot groot voordeel van Berkshire Hathaway. Een so ’n besluit was om in die middel van die finansiële krisis $5 miljard in Goldman Sachs te belê, ’n transaksie wat aan Berkshire Hathaway ’n rente-opbrengs van 10% per jaar besorg het.