Johannesburg. - Lok, bekeer en behou.
Dít is die strategie wat ondernemings moet volg om te verseker dat verbruikers hul webwerf besoek, later
terugkeer en uiteindelik sake na die onderneming bring.
Só sê mnr. Rob Stokes, uitvoerende hoof en stigter van Quirk, ’n
internetbemarkingsmaatskappy.
Stokes was een van die gaste van ENB Biznetwork se
entrepreneursgeleenthede wat landwyd uitgesaai word.
Stokes sê dit is belangrik vir ondernemings, ook dié in die
toerismesektor, om deurlopend met hul klante in verbinding te wees.
“Aanlyn bemarking is kritiek in die toerismebedryf –
Google-advertensies en soektogte, webwerfinligting en -ontwerp en
e-pos-nuusbriewe is ’n regstreekse en goedkoop manier om jou teikenmark te bereik,” sê Stokes.
Hy beklemtoon dat ’n persoon wat Google vir navorsing inspan
doelgerig is, weet waarna hy of sy soek en gewoonlik kliek op die skakels wat ná
die soektog boaan die resultatelys staan.
Ondernemings kan betaal om as ’n geborgde skakel boaan die lys
te staan of deur hul webwerf-aanbieding te verbeter ’n hoër posisie op die Google-ranglys
beklee, sê hy.
Stokes sê ’n goeie webwerf beantwoord verbruikers se vrae.
Klein sakeondernemings wil dikwels hê mense moet op die skakel na
hul webwerf kliek, maar doen nie genoeg om te verseker dat die inhoud van die webwerf aan die
verbruiker se behoeftes voldoen nie, sê hy.
Stokes sê dit is nie nodig om
duisende rande aan ’n webwerf te bestee nie – daar is verskeie aanlyn inisiatiewe wat kan help om dit goedkoop saam
te stel. Fokus op goeie inhoud, is sy raad.
Hy sê ’n goeie e-pos-nuusbrief is die ideale manier om jou
bemarkingstrategie uit te brei.
“Verbruikers sal dikwels belang stel in jou handelsnaam, maar gaan
nie noodwendig terugkeer (na die webwerf) nie,” sê hy.
’n E-pos-nuusbrief skep die geleentheid om verbruikers bewus te maak van jou handelsnaam.
Wanneer die verbruiker dan in die toekoms gereed is om iets te koop, sal hy jou handelsnaam onthou en terugkeer na
jou onderneming, sê hy.
Hy meen mondelinge bemarking moet ook
nie onderskat word nie. Ons vertrou mense soos onsself, sê Stokes.
“Webwerwe soos TripAdvisor is ’n bewys van die krag van die
internet uit ’n reisperspektief.
“’n Enorme 80% van reisigers vertel aanlyn van hul ondervindinge en verskaf daarmee ’n
konstante mondelinge verwysingspunt waarop toekomstige toeriste hul besluite kan
grond.
“Lui of swak bestuurde instellings sal gou ontmasker word in die
wêreldwye web waar daar nie wegkruipplek is nie,” sê hy.
Hy verwag dat Google-soektogte na verblyf en reisgeleenthede in
Suid-Afrika hoog sal bly ná die Wêreldbeker-sokkertoernooi.
“Maar as Suid-Afrikaanse hotelle, gastehuise en toeriste-attraksies
hulself nie bemark nie, sal die geleentheid verlore gaan,” sê Stokes.